ກຽມຮັບນັກທ່ອງທ່ຽວຕ່າງປະເທດ ຜ່ານລົດໄຟລາວ-ຈີນ

175

ກຽມຮັບນັກທ່ອງທ່ຽວຕ່າງປະເທດ ຜ່ານລົດໄຟລາວ-ຈີນ

ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງ ຖະແຫລງຂ່າວ , ວັດທະນະທໍາ ແລະ ທ່ອງທ່ຽວ ໃຫ້ສໍາພາດຫວ່າງບໍ່ດົນນີ້ກ່ຽວກັບການສົ່ງເສີມການທ່ອງທ່ຽວຫຼັງການເປີດເສັ້ນທາງລົດໄຟລາວ-ຈີນ ວ່າ:
ວຽກງານການທ່ອງທ່ຽວເປັນຂະແໜງການເສດຖະກິດທີ່ສໍາຄັນຂອງ ສປປ ລາວ ລັດຖະບານໄດ້ຖືເອົາການທ່ອງທ່ຽວເປັນບູລິມາສິດໃນການພັດທະນາເສດຖະກິດ-ສັງຄົມຂອງປະເທດ ກ່ອນໜ້ານີ້ທີ່ຈະມີການລະບາດຂອງພະຍາດໂຄວິດ-19 ເລີ່ມແຕ່ປີ 2015-2019

ແຕ່ລະປີສະເລ່ຍມີນັກທ່ອງທ່ຽວເຂົ້າມາ ສປປ ລາວ ປະມານ 4,5 ລ້ານຄົນ ແລະນໍາລາຍໄດ້ເຂົ້າປະເທດປະມານ 800 ລ້ານໂດລາສະຫະລັດ.
ນັກທ່ອງທ່ຽວທີ່ເຂົ້າມາຢ້ຽມຢາມ ສປປ ລາວ ຫຼາຍທີ່ສຸດແມ່ນບັນດາປະເທດອາຊີຕາເວັນອອກສ່ຽງໃຕ້, ເອີລົບ, ອາເມລິການຕາມລໍາດັບ . ນັກທ່ອງທ່ຽວຈີນເປັນໜຶ່ງໃນຕະຫຼາດທ່ອງທ່ຽວສາກົນທີ່ເດີນທາງເຂົ້າມາທ່ຽວ ສປປ ລາວ ຫຼາຍ ເປັນອັນດັບສອງ ຊຶ່ງໄດ້ປະກອບສ່ວນສໍາຄັນຕໍ່ການຂະຫຍາຍຕົວຂອງການທ່ອງທ່ຽວລາວ.

ໃນປີ 2019 ລັດຖະບານສອງປະເທດໄດ້ປະກາດເປັນ “ປີທ່ອງທ່ຽວລາວ-ຈີນ” ເຊິ່ງມີນັກທ່ອງທ່ຽວຈີນຈໍານວນ 1,022,727 ຄົນທີ່ເຂົ້າມາທ່ຽວລາວກວມເອົາ 21.35% ຂອງນັກທ່ອງທ່ຽວທັງໝົດ.
ແຕ່ລະປີມີນັກທ່ອງທ່ຽວຈີນຫລາຍກ່ວາຮ້ອຍລ້ານຄົນ ທີ່ເດີນທາງໄປທ່ອງທ່ຽວປະເທດຕ່າງໆໃນທົ່ວໂລກ, ເຫັນໄດ້ວ່າເປັນຕະຫຼາດບົ່ມຊ້ອນໃຫຍ່ຫຼວງ ໂດຍອີງໃສ່ທ່າແຮງຊັບພະຍາກອນດ້ານການທ່ອງທ່ຽວຂອງ ສປປ ລາວແມ່ນມີຫຼາຍ ດັ່ງນັ້ນ, ພວກເຮົາກໍມີເປົ້າໝາຍໃນການດຶງດູດນັກທ່ອງທ່ຽວຈີນເຂົ້າມາທ່ອງທ່ຽວ ສປປ ລາວ.
ໃນອານາຄົດອັນໃກ້ໆນີ້ ເສັ້ນທາງລົດໄຟລາວ-ຈີນ ຈະເປັນການສ້າງເງື່ອນໄຂອໍານວຍຄວາມສະດວກໃນການບັນລຸເປົ້າໝາຍ ໜຶ່ງແລວໜຶ່ງເສັ້ນທາງຂອງສອງຊາດ ທັງຈະເປັນການສົ່ງເສີມ ແລະພັດທະນາເສດຖະກິດ-ສັງຄົມ ອີກດ້ວຍ.
ທ່ານ ອຸນທວງ ກ່າວອີກວ່າ:

ເພື່ອສົ່ງເສີມການທ່ອງທ່ຽວພາຍຫັລງເປີດເສັ້ນທາງລົດໄຟລາວ-ຈີນ ສປປ ລາວໄດ້ກະກຽມຄວາມພ້ອມຂະແໜງການທ່ອງທ່ຽວໄດ້ປະສານສົມທົບກັບຂະແໜງການທີ່ກ່ຽວຂ້ອງມີແຜນພັດທະນາບັນດາພື້ນຖານໂຄງລ່າງ ເພື່ອຮັບໃຊ້ການບໍລິການທ່ອງທ່ຽວ ຢູ່ຕາມສະຖານີລົດໄຟ ຂອງບັນດາແຂວງທີ່ມີເສັ້ນທາງລົດໄຟແລ່ນຜ່ານ ພ້ອມກັນນັ້ນກະຊວງ ຖວທ ກໍໄດ້ຊີ້ນໍາໃຫ້ບັນດາແຂວງ ກໍານົດຜະລິດຕະພັນການທ່ອງທ່ຽວຂອງຕົນ ແລະສຶກສາຄົ້ນຄ້ວາວິໄຈຄວາມຕ້ອງການຂອງນັກທ່ອງທ່ຽວທັງພາຍໃນ ແລະຕ່າງປະເທດ ກໍ່ຄືນັກທ່ອງທ່ຽວຈາກ ສປຈີນ.
ນອກນັ້ນພວກເຮົາຍັງເອົາໃຈໃສ່ໃນການວາງແຜນຄົ້ນຄ້ວາພັດທະນາກິດຈະກໍາການທ່ອງທ່ຽວຕາມເສັ້ນທາງລົດໄຟໃຫ້ເຊື່ອມຈອດກັບບັນດາຈຸດໝາຍປາຍທາງການທ່ອງທ່ຽວຂອງບັນດາແຂວງທີ່ໄດ້ກໍານົດໄວ້ໃນແຜນພັດທະນາການທ່ອງທ່ຽວ.

ທັງໄດ້ສົມທົບກັບກະຊວງການຕ່າງປະເທດ, ກະຊວງປ້ອງກັນຄວາມສະຫງົບ ຄົ້ນຄ້ວານິຕິກໍາ ຂັ້ນຕອນແຜນໃນການອໍານວຍຄວາມສະດວກດ້ານການອອກວີຊາ ແລະການເດີນທາງຜ່ານດ່ານຊາຍແດນໃຫ້ກັບນັກທ່ອງທ່ຽວ ນັກທ່ອງທ່ຽວສາກົນ ລວມທັງນັກທ່ອງທ່ຽວຈີນ ທີ່ຈະມານໍາໃຊ້ການບໍລິການຂົນສົ່ງຕາມເສັ້ນທາງລົດໄຟລາວ-ຈີນ, ກະຊວງໂຍທາທິການ ແລະຂົນສົ່ງ ໂດຍສະເພາະແມ່ນບໍລິສັດການບິນລາວກໍໄດ້ສົມທົບກັບບໍລິສັດທາງລົດໄຟລາວຈີນປຶກສາຫາລືການເຊື່ອມຕໍ່ການເດີນທາງລະຫ່ວາງການບິນລາວ ແລະທາງລົດໄຟລາວ-ຈີນ ເພື່ອເປັນທາງເລືອກໃຫ້ນັກທ່ອງທ່ຽວ.

ໃນປະຈຸບັນພວກເຮົາກໍໄດ້ມີແຜນຟື້ນຟູການທ່ອງທ່ຽວທີ່ໄດ້ຮັບຜົນກະທົບຈາກການລະບາດຂອງພະຍາໂຄວິດ-19 ກະຊວງ ຖວທໄດ້ຮັບການມອບໝາຍຈາກລັດຖະບານໃຫ້ສົມທົບກັບຂະແໜງການທີ່ກ່ຽວຂ້ອງ ແລະ ຜູ້ປະກອບການຄົ້ນຄ້ວາບັນດານິຕິກໍາຕ່າງໆເພື່ອນໍາສະເໜີລັດຖະບານເປີດປະເທດຕ້ອນຮັບນັກທ່ອງທ່ຽວໃນຕໍ່ໜ້າ.

ທ່ານຮອງລັດຖມົນຕີຍັງເຊື່ອໜັ້ນວ່າພາຍໃຕ້ການຊີ້ນໍາຂອງພັກ ແລະລັດຖະບານ ການກະກຽມຄວາມພ້ອມຂອງ ສປປ ລາວ ເພື່ອສົ່ງເສີມການທ່ອງທ່ຽວເວົ້າລວມ ເວົ້າສະເພາະຕາມແລວທາງລົດໄຟລາວ-ຈີນ ຈະໄດ້ຮັບຜົນສໍາເລັດເປັນຢ່າງດີ ພວກເຮົາມີຄວາມຍິນດີຕ້ອນຮັບນັກທ່ອງທ່ຽວຈີນ ເຂົ້າມາທ່ອງທ່ຽວ ສປປ ລາວ ເພື່ອສໍາຜັດກັບທິວທັດທໍາມະຊາດສວຍງາມມະຫັດສະຈັນ ແລະວິຖີຊີວິດວັດທະນະທໍາທີ່ຫຼາກຫຼາຍຂອງປະຊາຊົນລາວ.
ຂໍ້ມູນ ຈາກ CRI.