ລົງແກ້ໄຂຮ້ານສະນຸກເກີ ທີ່ບໍ່ປະຕິບັດມາດຕະການ

245

ກອງພັນປ້ອງກັນເຄື່ອນທີ່ ນວ ຕັ້ງໜ້າຮັບຄຳສະເໜີຈາກສັງຄົມແກ້ໄຂ ຮ້ານສະນຸກເກີ ທີ່ບໍ່ປະຕິບັດມາດຕະການຄວບຄຸມການແຜ່ລະບາດພະຍາດໂຄວິດ-19 ພາຍໃນເວລາ 1 ຊົ່ວ


ໃນວັນທີ 21 ເມສາ 2021 ເວລາ 17:00 ເຈົ້າໜ້າທີ່ໄດ້ຮັບແຈ້ງຄວາມຈາກພົນລະເມືອງດີວ່າມີຮ້ານສະນຸກເກີໄດ້ເປີດບໍລິການຢູ່ເຂດບ້ານໂນນສະຫງ່າ ເມືອງໄຊເສດຖາ ນະຄອນຫຼວງວຽງຈັນ, ດັ້ງນັ້ນເຈົ້າໜ້າທີ່ກອງພັນປ້ອງກັນເຄື່ອນທີ່ ຈຶ່ງໄດ້ອອກກວດກາ ຮອດເວລາເວລາ 17:50 ສາມາດກວດພົບເຫັນຮ້ານດັ່ງກ່າວ

ຈຶ່ງເຂົ້າຄວບຄຸມພົບເຫັນຜູ້ມາໃຊ້ບໍລິການ ຈຳນວນ 10 ຄົນ, ພະນັກງານເຝົ້າຮ້ານ 2 ຄົນ, ຈາກນັ້ນໄດ້ມອບໃຫ້ ປກສ ກຸ່ມ, ອໍານາດການປົກຄອງບ້ານສືບຕໍ່ເກັບກໍາຂໍ້ມູນ ສຶກສາອົບຮົມ ແລະ ເຮັດບົດບັນທຶກກ່າວເຕືອນ ແລະ ມອບໃຫ້ເຈົ້າຂອງຮ້ານຖ້າມີເຫດການກໍລະນີຕິດເຊື້ອພະຍາດໂຄວິດ-19 ຕ້ອງຮັບຜິດຊອບທາງແພ່ງ ແລະ ທາງອາຍາຕໍ່ຜົນເສຍຫາຍທີ່ເກີດຂຶ້ນ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ໃຫ້ປະຕິບັດຕາມສັ່ງຂອງນາຍົກລັດຖະມົນຕີ ເລກທີ 15/ນຍ ລົງວັນທີ 21 ເມສາ 2021 ຢ່າງເຂັ້ມງວດ, ຖ້າເຈົ້າໜ້າທີ່ຊອກຮູ້ກວດພົບ ທີ່ຍັງສືບຕໍ່ລະເມີດຈະໄດ້ນຳໃຊ້ມາດຕະການທາງກົດໝາຍຢ່າງບໍ່ມີຂໍ້ຍົກເວັ້ນ ທັງນີ້ກໍ່ເພື່ອເປັນການຄວບຄຸມ, ສະກັດກັ້ນ ການແຜ່ລະບາດຂອງພະຍາດ COVID-19

ທີ່ຈະສືບຕໍ່ແພ່ລະບາດ, ຮຽກຮ້ອງມາຍັງພໍ່ແມ່ປະຊາຊົນຊາວນະຄອນຫຼວງວຽງຈັນ ທຸກຊັ້ນຄົນ ຊ່ວຍເປັນຫູເປັນຕາຊ່ວຍເຈົ້າໜ້າທີ່ພົບເຫັນສະຖານທີ່ໃດທີ່ຍັງລະເມີດຄຳສັ່ງ, ແຈ້ງການຕ່າງໆໃຫ້ແຈ້ງທາງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.