ຄະນະສະເພາະກິດ ສະເໜີລັດຖະບານ ລ໋ອກດາວ ຕື່ມອີກ 15 ວັນ ເພື່ອຕ້ານໂຄວິດ-19

589

ເນື່ອງຈາກການແພ່ລະບາດຂອງພະຍາດໂຄວິດ- 19 ຢູ່ພາຍໃນປະເທດ ຍັງບໍ່ທັນມີທ່າອ່ຽງຫຼຸດລົງ. ດັ່ງນັ້ນ,ຄະນະສະເພາະກິດຄວບຄຸມ, ສະກັດກັ້ນ, ຕ້ານ ແລະ ແກ້ໄຂການແພ່ລະບາດຂອງໂຄວິດ-19 ຈຶ່ງສະເໜີໃຫ້ລັດຖະບານ ສືບຕໍ່ຈັດຕັ້ງປະຕິບັດ ( ລ໋ອກດາວ ) ອອກໄປຕື່ມອີກ ຈົນຮອດວັນທີ 20 ພຶດສະພາ 2021.

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະ ມົນຕີ, ຫົວໜ້າສະເພາະກິດຄວບຄຸມ, ສະກັດກັ້ນ, ຕ້ານ ແລະ ແກ້ໄຂການແພ່ລະບາດຂອງໂຄວິດ-19 ຂັ້ນສູນກາງ, ພ້ອມຄະນະ ໄດ້ຖະແຫຼງຂ່າວ ໃນວັນທີ 4 ພຶດສະພາ 2021 ວ່າ: ເຖິງແມ່ນການລັດຖະບານ ກໍຄື ຄະນະສະເພາະກິດ ໄດ້ສຸມໃສ່ມາດຕະການປ້ອງກັນ

ສະກັດກັ້ນການແພ່ລະບາດຂອງພະຍາດໂຄວິດ ພາຍໃນປະເທດຢ່າງຕັ້ງໜ້າກໍຕາມ, ແຕ່ການຕິດເຊື້ອຢູ່ຫຼາຍແຂວງ ໂດຍສະເພາະ ໃນນະ ຄອນຫຼວງວຽງຈັນ ມີເປັນຈໍານວນຫຼວງຫຼາຍ, ການໃຫ້ຂໍ້ມູນທີ່ຊັດເຈນ ເພື່ອຈະນໍາເອົາຜູ້ທີ່ຕິດເຊື້ອມາປິ່ນປົວນັ້ນ ມີຄວາມຫຼ້າຊ້າ ແລະ ຈໍານວນໜຶ່ງບໍ່ປະ ຕິບັດຕາມມາດຕະການທີ່ວາງອອກ ຈິ່ງມີຄວາມສ່ຽງທີ່ຈະນໍາເອົາພະຍາດໄປແພ່ລະບາດຢູ່ໃນຊຸມ ຊົນ.

ນອກນີ້, ການແພ່ລະບາດຂອງພະຍາດໂຄວິດ-19 ຢູ່ພາຍໃນປະເທດຍັງບໍ່ທັນຫຼຸດລົງໄດ້ເທື່ອ. ດັ່ງນັ້ນ, ສະເໜີ ໃຫ້ລັດຖະບານ ສືບຕໍ່ຈັດຕັ້ງປະຕິບັດມາດຕະການທີ່ກໍານົດໄວ້ ຢູ່ໃນຄໍາສັ່ງ ເລກທີ 15/ນຍ, ແຈ້ງການ, ຄໍາແນະນໍາ ແລະ ມາດຕະການອື່ນໆ ທີ່ຂະແໜງການ

ແຂວງວາງອອກ ໃຫ້ເຂັ້ມງວດ ແລະ ສືບຕໍ່ປະຕິບັດໄປອີກ 15 ວັນຕໍ່ໜ້າ ຈົນໄປເຖິງວັນທີ 20 ພຶດສະພາ 2021 ແລະ ຄະນະສະເພາະກິດ ຈະພິຈະລະນາຢ່າງເລິກຊຶ່ງ, ຕິດຕາມສະພາບການຢ່າງໃກ້ຊິດ, ຄາດຄະເນຢ່າງຖືກຕ້ອງກ່ຽວກັບທ່າອ່ຽງຂອງການຜັນແປ ແລ້ວຈະມີວິທີການປັບປຸງແກ້ໄຂໃຫ້ທັນການ ແລະໃຫ້ສອດຄ່ອງກັບສະພາບຄວາມເປັນຈິງ.

ສະນັ້ນ,ຈິ່ງໄດ້ຖະແຫຼງ ມາຍັງພໍ່ແມ່ພີ່ນ້ອງປະຊາ ຊົນໃນຂອບເຂດທົ່ວປະເທດ ໄດ້ຮັບຊາບຕາມຈິດໃຈຂອງຄະນສະເພາະກິດ,ພ້ອມທັງຮຽກຮ້ອງ ມາຍັງທຸກການຈັດຕັ້ງຂອງພັກ-ລັດ, ອົງການຈັດຕັ້ງ ແນວໂຮມ, ການຈັດຕັ້ງມະຫາຊົນ, ທຸກການຈັດຕັ້ງສັງຄົມ ຈົ່ງເປັນກໍາລັງແຮງ ໃນການຈັດຕັ້ງປະຕິບັດບັນດາມາດຕະການວາງອອກ ຢ່າງເປັນເອກະພາບ ແລະ ມີຄວາມຮັບຜິດຊອບສູງ.
ພາບ-ຂ່າວ: ບຸນຖີນ ນິລະໄຊ