ສປປ ລາວ ພົບຄົນຕິດເຊື້ອເພີ່ມອີກ 72 ຄົນ ແລະ ປິ່ນປົວຫາຍດີເພີ່ມອີກ 42 ຄົນ

800

ຂປລ. ໃນວັນທີ 15 ພຶດສະພາ 2021 ຢູ່ກະຊວງສາທາລະນະສຸກ, ທ່ານ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຕາງໜ້າກອງເລຂາ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ມີການລາຍງານຜູ້ຕິດເຊື້ອໃໝ່ 72 ຄົນ ເຮັດໃຫ້ຈໍານວນຜູ້ຕິດເຊື້ອສະສົມທັງໝົດ ເປັນ 1.570 ຄົນ, ມີຜູ້ເສຍຊິວິດສະສົມທັງໝົດ 2 ຄົນ. ໃນຈຳນວນຜູ້ຕິດເຊື້ອທັງໝົດ ແມ່ນໄດ້ ຮັບການປິ່ນປົວດີ ທັງໝົດ 555 ຄົນ

(ໃໝ່ 42 ຄົນ) ແລະ ພວກກ່ຽວຈະຕ້ອງໄປສືບຕໍ່ຈຳກັດບໍລິເວນຢູ່ເຮືອນຈົນຄົບກຳນົດຕາມຄຳແນະນຳຂອງແພດຢ່າງເຄັ່ງຄັດ ແລະ ຍັງນອນສືບຕໍ່ ຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ໃນແຕ່ລະແຂວງ ຈຳນວນ 1.013 ຄົນ. ປັດຈຸບັນ, ທົ່ວປະເທດ ມີສູນຈໍາກັດບໍລິເວນທີ່ເປີດນຳໃຊ້ຢູ່ ທັງໝົດ 44 ສູນ, ມີຜູ້ຈຳກັດບໍລິເວນທັງໝົດ 3.469 ຄົນ ແລະ ທຸກຄົນທີ່ເຂົ້າມາສູນດັ່ງກ່າວແມ່ນ ໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19.

ທ່ານ ດຣ. ພອນປະເສີດ ໄຊຍະມຸງຄຸນ ໄດ້ກ່າວວ່າ: ສໍາລັບການບໍລິການສັກວັກຊິນກັນພະຍາດ COVID-19 ນອກຈາກມີການບໍລິການ ຢູ່ໂຮງໝໍແລ້ວ, ພວກເຮົາຍັງມີການສັກຢາຢູ່ສະໜາມອີກ 3 ຈຸດ ຄື: ຊັງຈຽງ ຈະເປີດບໍລິການເປັນປົກກະຕິ, ສູນການຄ້າລາວ-ໄອເຕັກ ຈະສືບຕໍ່ສັກຈົນ ຮອດວັນທີ 20 ພຶດສະພາ 2021 ຈະໄດ້ຢຸດການໃຫ້ບໍລິການ, ສໍາລັບ ຢູ່ວຽງຈັນເຊັນເຕີ ມື້ນີ້ ເປັນມື້ສຸດທ້າຍໃນການໃຫ້ບໍລິການສັກຢາວັກຊິນດັ່ງກ່າວ ແລ້ວທີມງານຈະໄປເປີດຈຸດສັກວັກຊິນຢູ່ ວັດຈີນ ຢູ່ບ້ານດົງປາແລບ, ເມືອງຈັນທະບູລີ, ນະຄອນຫລວງວຽງຈັນ.

ພ້ອມນີ້, ທ່ານຍັງຮຽກຮ້ອງໃຫ້ພໍ່ແມ່ ປາຊາຊົນໃນຂອບເຂດທົ່ວປະເທດ ຈົ່ງພິຈາລະ ນາໄຕ່ຕອງຂ່າວຕ່າງໆທາງອອນລາຍໃຫ້ຖືກຕ້ອງ ແລະ ຮຽກຮ້ອງມາຍັງທ່ານໃຫ້ຮັບຊົມຂ່າວຈາກເເຫລງຂໍ້ມູນຂ່າວສານທີ່ເປັນທາງການ; ຮຽກຮ້ອງມາຍັງພໍ່ແມ່ປະຊາຊົນ, ທັງພາກລັດ ແລະ ເອກະຊົນ ພ້ອມໃຈປະຕິບັດຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 15/ນຍ ຢ່າງເຄັ່ງຄັດ. ຖ້າບັນດາທ່ານຝ່າຝືນບໍ່ປະຕິບັດຕາມຄໍາສັ່ງ

ຈະໄດ້ຖືກປະຕິບັດລະບຽບວິໄນຕາມກົດໝາຍ ແຫ່ງ ສປປ ລາວ. ສຳລັບ ທ່ານທີ່ຈະໄປສັກວັກຊິນ, ຖ້າຫາກທ່ານມີພະຍາດປະຈຳໂຕ ຈຳເປັນຕ້ອງໄດ້ກິນຢາ ໃນໄລຍະເວລາດັ່ງກ່າວ ຂໍໃຫ້ທ່ານພົກພາຢາປະຈຳໂຕຂອງທ່ານໄປນຳ ຕາມຄຳແນະນຳຂອງແພດ. ນອກຈາກນັ້ນ ການຕື່ມຂໍ້ມູນລົງໃນແບບຟອມ ຖ້າຫາກໃນແບບຟອມ ບໍ່ໄດ້ລະບຸພະຍາດປະຈຳໂຕຂອງທ່ານ

ທ່ານສາມາດຕື່ມຂໍ້ມູນເພີ່ມເຕີມໃສ່ໄດ້ ເພື່ອເປັນຂໍ້ມູນໃຫ້ແກ່ແພດໝໍ ໃນການພິຈາະລະນາການສັກວັກຊິນ ໃຫ້ແກ່ທ່ານ.
ຂ່າວ: ສຸກສະຫວັດ ສົມສະໜິດ | ຂປລ