ກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ສ.ເກົາຫລີ ຄັ້ງທີ 11

48

ຂປລ. ໃນວັນທີ 8 ກັນຍາ 2021 ທີ່ນະຄອນຫລວງວຽງຈັນ, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດ ຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ສ.ເກົາຫລີ ຄັ້ງທີ 11 ໃນຮູບແບບກອງປະຊຸມທາງ ໄກ, ພາຍໃຕ້ການເປັນປະທານຮ່ວມ ຂອງ ທ່ານ ປຣາກ ໂຊຄົນ (Prak SOKHONN), ຮອງນາຍົກ ລັດຖະມົນຕີ, ລັດຖະມົນຕີ ກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາ ຈັກ ກໍາປູເຈຍ ແລະ ທ່ານ ຈອງ ອຸຍຢອງ (Chung Eui-yong), ລັດຖະມົນຕີ ກະຊວງການຕ່າງປະເທດ ແຫ່ງ ສ.ເກົາຫລີ ແລະ ມີບັນດາລັດຖະມົນຕີ ຕ່າງປະເທດ ຈາກປະເທດສະມາຊິກແມ່ນໍ້າຂອງ ຄື: ມຽນມາ, ໄທ ແລະ ຫວຽດນາມ ເຂົ້າຮ່ວມຢ່າງພ້ອມພຽງ.ກອງປະຊຸມໄດ້ທົບທວນຄືນຄວາມຄືບໜ້າ ໃນການຮ່ວມມື ພາຍໃຕ້ຂອບການຮ່ວມມືແມ່ນໍ້າຂອງ – ສ.ເກົາຫລີ ໃນໄລຍະ 10 ປີ ຜ່ານມາ, ໂດຍສະເພາະ ການຈັດຕັ້ງປະຕິບັດບັນດາໂຄງການ ແລະ ແຜນງານ ພາຍໃຕ້ 3 ເສົາຄໍ້າຂອງການຮ່ວມມື (ປະຊາຊົນ, ຄວາມຈະເລີນຮຸ່ງເຮືອງ ແລະ ສັນຕິພາບ) ແລະ 7 ຂົງເຂດບູລິມະສິດ (ຂົງເຂດວັດທະນະທໍາ ແລະ ການທ່ອງທ່ຽວ; ການພັດທະ ນາຊັບພະຍາກອນມະນຸດ; ກະສິກໍາ ແລະ ພັດທະນາຊົນນະບົດ; ພັດທະນາພື້ນຖານໂຄງລ່າງ; ຂໍ້ມູນຂ່າວສານ ແລະ ເຕັກໂນໂລຊີ; ສິ່ງແວດລ້ອມ; ແລະ ສິ່ງທ້າທາຍແບບໃໝ່). ກອງປະຊຸມ ຍັງໄດ້ທົບທວນຄືນໝາກຜົນ ຂອງການຈັດຕັ້ງປະຕິບັດບັນດາເນື້ອໃນ ທີ່ໄດ້ຕົກລົງກັນໃນກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ສ. ເກົາຫລີ ຄັ້ງທີ 10 ແລະ ກອງປະຊຸມສຸດຍອດຂອບການຮ່ວມມືແມ່ນໍ້າຂອງ – ສ.ເກົາຫລີ ຄັ້ງທີ 2 ໃນ ປີ 2020 ຜ່ານມາ. ພ້ອມດຽວກັນນີ້, ກອງປະຊຸມຍັງໄດ້ຮ່ວມກັນປຶກສາຫາລື ແລະ ວາງທິດທາງແຜນການຮ່ວມມືໃນຕໍ່ໜ້າ, ຊຶ່ງບັນດາລັດຖະມົນຕີຕ່າງ ປະເທດແມ່ນໍ້າຂອງ ແລະ ສ.ເກົາຫລີ ໄດ້ໃຫ້ຄວາມສໍາຄັນ ໃນການຟື້ນຟູສະພາບເສດຖະກິດ-ສັງຄົມ ພາຍຫລັງການແຜ່ລະບາດຂອງພະຍາດໂຄວິດ-19 ໂດຍການສືບຕໍ່ຜັນຂະຫຍາຍ ແຜນປະຕິບັດງານ ໄລຍະ 5 ປີ ເພື່ອຈັດຕັ້ງປະຕິບັດ ຖະແຫລງການແມ່ນໍ້າຂອງ-ແມ່ນໍ້າຮານ (2021-2025). ນອກນັ້ນ, ກອງປະຊຸມຍັງໄດ້ປຶກສາຫາລືເພື່ອກຽມຄວາມພ້ອມ ໃຫ້ແກ່ການຈັດກອງປະຊຸມສຸດຍອດຂອບການຮ່ວມມືແມ່ນໍ້າຂອງ-ສ.ເກົາຫລີ ຄັ້ງທີ 3 ໃນທ້າຍເດືອນຕຸລາ ທີ່ຈະມາເຖິງນີ້. ພ້ອມນີ້, ບັນດາລັດຖະມົນຕີ ຍັງໄດ້ຮ່ວມກັນສະແດງຄວາມຊົມເຊີຍ ເນື່ອງໃນໂອກາດຄົບຮອບ 10 ປີ ແຫ່ງການຮ່ວມມືແມ່ນໍ້າຂອງ – ສ.ເກົາຫລີ ແລະ ປີແລກປ່ຽນແມ່ນໍ້າຂອງ – ສ.ເກົາຫລີ ໃນປີ 2021 ນີ້ (Mekong-ROK Exchange Year).ໃນໂອກາດດຽວກັນ, ທ່ານລັດຖະມົນຕີ ສະເຫລີມໄຊ ກົມມະສິດ ກໍໄດ້ປະກອບຄໍາເຫັນໃນກອງປະຊຸມ, ໂດຍໄດ້ເນັ້ນເຖິງຄວາມສໍາຄັນ ຕໍ່ວິທີທາງໃນການຫລຸດຜ່ອນຜົນກະທົບ ຈາກການແຜ່ລະ ບາດຂອງພະຍາດໂຄວິດ-19 ຕໍ່ຊີວິດການເປັນຢູ່ຂອງປະຊາຊົນ ແລະ ເສດຖະກິດໃນພາກພື້ນ ໂດຍສະເໜີ ໃຫ້ມີການເພີ່ມທະວີການຮ່ວມມືທາງດ້ານໂລຈິດສະຕິກທີ່ທັນສະໄໝ ເພື່ອສົ່ງເສີມການເຊື່ອມຈອດເສດຖະກິດຂ້າມຊາຍແດນ ແລະ ການເຊື່ອມໂຍງພາກພື້ນແມ່ນໍ້າຂອງ-ສ.ເກົາຫລີ ເພື່ອອໍານວຍຄວາມສະດວກໃນການຂົນສົ່ງສິນຄ້າ ລວມໄປເຖິງການໄປມາຫາສູ່ກັນລະຫວ່າງປະຊາຊົນ, ສ້າງເງື່ອນ ໄຂສະດວກ ໃຫ້ແກ່ບັນດາຈຸລະວິສາຫະກິດ, ວິຫາສະກິດຂະໜາດນ້ອຍ ແລະ ກາງ ໃຫ້ສາມາດເຂົ້າເຖິງແຫລ່ງທຶນ ແລະ ຕະຫລາດໃນພາກພື້ນ, ສົ່ງເສີມໃຫ້ມີການຮ່ວມມື ໃນຂົງເຂດອຸດສາຫະກໍາດິຈີຕອນ, ເຕັກໂນໂລຊີທີ່ທັນສະໄໝ, ການຄ້າເອເລັກໂຕນິກ (e-commerce) ແລະ ການສຶກສາເອເລັກໂຕນິກ (e-learning). ພ້ອມນີ້, ທ່ານ ລັດຖະມົນຕີ ສະເຫລີມໄຊ ກົມມະສິດ ໃນນາມຫົວໜ້າຄະນະຜູ້ແທນລາວ ໄດ້ສະແດງຄວາມຊົມເຊີຍຕໍ່ລັດຖະບານ ສ.ເກົາຫລີ ທີ່ໄດ້ໃຫ້ການຊ່ວຍເຫລືອອຸປະກອນການແພດ ແລະ ວັກຊິນ ເພື່ອຮັບມື ແລະ ຕ້ານກັບການແຜ່ລະບາດຂອງພະຍາດໂຄວິດ-19 ໃຫ້ແກ່ບັນດາປະເທດແມ່ນໍ້າຂອງ ລວມທັງ ສປປ ລາວ ລວມມູນຄ່າ 200 ລ້ານໂດລາສະຫະລັດ ຜ່ານໂຄງ ການ COVAX ພາຍໃນປີ 2022. ກອງປະຊຸມໄດ້ຮັບຮອງເອົາຖະແຫລງການ ປະທານຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ສ.ເກົາຫລີ ຄັ້ງທີ 11 ແລະ ປະກາດອະນຸມັດໂຄງການຊ່ວຍເຫລືອ ຈາກກອງທຶນຮ່ວມມືແມ່ນໍ້າຂອງ-ສ.ເກົາຫລີ ງວດທີ 5, ເພື່ອເປັນຖານໃນການຈັດຕັ້ງຜັນຂະຫຍາຍການຮ່ວມມືແບບຄູ່ຮ່ວມຍຸດທະສາດ ໃຫ້ເກີດປະສິດທິຜົນ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນບັນດາປະເທດສະມາຊິກ ໃນຂອບການຮ່ວມມືແມ່ນໍ້າຂອງ – ສ.ເກົາຫລີ.