ໜັກໜ້າທຸກມື້!ກວດພົບຜູ້ຕິດເຊື້ອ 7 ຄົນໃນກຸ່ມໄວໜຸ່ມ 32 ຄົນ ທີ່ຊຸມແຊວຢູ່ໂຮງແຮມໂຄ້ງຄຳ

1003

ໜັກໜ້າທຸກມື້!ກວດພົບຜູ້ຕິດເຊື້ອ 7 ຄົນໃນກຸ່ມໄວໜຸ່ມ 32 ຄົນ ທີ່ຊຸມແຊວຢູ່ໂຮງແຮມໂຄ້ງຄຳ

ທ່ານ ພັທ ອຸດອນ ຈັນທະວົງ ຮອງຫົວໜ້າຫ້ອງ ສັນຕິບານ ປກສ ນວ ໃຫ້ຮູ້ວ່າ: ຜ່ານການສືບສວນ ສອບສວນ ຈຳນວນ 32 ຄົນ ທີ່ໄດ້ກັກຕົວຢູ່ ໂຮງແຮມໂຄ້ງຄຳ, ມີຜູ້ກະທຳຜິດທາງອາຍາ 4 ຄົນ, ໃນຂໍ້ຫາມີອາວຸດເສີກໄວ້ໃນຄອບຄອງ ( ສົ່ງໃຫ້ ຫ້ອງຕຳຫຼວດ ດໍາເນີນຄະດີ ) ສ່ວນອີກ 28 ຄົນ, ຍິງ 13 ຄົນ

ທີ່ໄດ້ລະເມີດຄໍາສັ່ງ, ແຈ້ງການ ເຈົ້າໜ້າທີ່ຫ້ອງສັນຕິບານ ປກສ ນວ ໄດ້ໃຊ້ມາດ ຕະການສຶກສາອົບຮົມ ແລະ ປັບໃໝ 3.000.000 ກີບ/ຄົນ ພ້ອມທັງນຳໄປຈຳກັດບໍລິເວນຢູ່ໂຮງແຮມ ປານີ ບ້ານຊຽງດາ ເມືອງໄຊເຊດຖາ ຕາມຄວາມ ສະໝັກໃຈຂອງຜູ້ລະເມີດ ໂດຍໃຫ້ຮັບຜິດຊອບຄ່າ ໃຊ້ຈ່າຍຢູ່ກິນດ້ວຍຕົນເອງທັງໝົດ, ມາຮອດວັນທີ 7 ຕຸລາ 2021 ຈຶ່ງກວດພົບເຊື້ອ ຈໍານວນ 7 ຄົນ

ໄດ້ ນຳຕົວໄປຕິດຕາມອາການ ແລະ ປິ່ນປົວ ຢູ່ໂຮງໝໍ ສະໜາມ ຫຼັກ 27 ແລະ ໂຮງໝໍສະໝາມວັງຊັບ ໂດຍໃຫ້ພວກກ່ຽວຮັບຜິດຊອບຄ່າໃຊ້ຈ່າຍການກິນ ຢູ່ ແລະ ປິ່ນປົວເອງທັງໝົດ ເພາະເປັນການກະທຳ ໂດຍເຈດຕະນາ, ສ່ວນ 21 ຄົນ ສືບຕໍ່ຈຳກັດ ບໍລິເວນໃຫ້ຄົບກຳນົດ 14 ວັນ ເຈົ້າໜ້າທີ່ຈະນຳຕົວມາດຳເນີນຄະດີຕາມກົດໝາຍ

ກອງບັນຊາການ ປກສ ນະຄອນຫຼວງວຽງຈັນ ແຈ້ງ ມາຍັງບັນດາທ່ານ ໃຫ້ເຂົ້າໃຈຕື່ມອີກວ່າ: ການ ອອກມາດຕະການຫ້າມບໍ່ໃຫ້ມີການຈັດຕັ້ງຊຸມ ແຊວ, ເປີດບໍລິການກີນດື່ມສິ່ງມືນເມົາ ກໍ່ຍ້ອນວ່າ ພຶດຕິກຳເຫຼົ່ານີ້ເປັນສາເຫດການແຜ່ເຊື້ອໄດ້ງ່າຍ ດັ່ງກໍລະນີນີ້ ຖ້າວ່າເຈົ້າໜ້າທີ່ບໍ່ສະກັດກັ້ນໄວ້ໄດ້ໃນ ຈຳນວນ 32 ຄົນນີ້ ຈະນໍາເອົາເຊື້ອໄປແຜ່ໃສ່ຄົນໃນ ສັງຄົມຍິ່ງຈະຫຼາຍໄປກວ່ານີ້.

ປກສ ນະຄອນຫຼວງວຽງຈັນ ຮຽກຮ້ອງມາຍັງທຸກ ທ່ານຈົ່ງເປັນຫູເປັນຕາຊ່ວຍເຈົ້າໜ້າທີ່ ໃນການສະ ກັດກັ້ນ ຖ້າພົບເຫັນປາກົດການຫຍໍ້ທໍ້ ໂທແຈ້ງເບີ ວອດແອັບ ປກສ ນວ 020 28899774