ຜູ້ນໍາໄຕ້ຫວັນກ່າວຈະບໍ່ມີວັນຍອມຮ່ວມຊາດກັບຈີນ ຫຼັງສີຈິ້ນຜິງປະກາດຈະຮ່ວມຊາດກັບໄຕ້ຫວັນໃຫ້ສໍາເລັດ

591

ວັນທີ 10 ຕຸລາ 2021 ສໍານັກຂ່າວ CNA ລາຍງານວ່າ ປະທານາທິບໍດີ Tsai Ing-wen ຂອງໄຕ້ຫວັນ ກ່າວໃນສູນທໍລະພົດໃນວັນຊາດວ່າ ໄຕ້ຫວັນຈະຍັງສົ່ງເສີມການປ້ອງກັນຕົນເອງຢ່າງຕໍ່ເນື່ອງ ເພື່ອໃຫ້ແນ່ນອນວ່າບໍ່ມີໃຜສາມາດບັງຄັບໃຫ້ໄຕ້ຫວັນຕ້ອງຍອມປະຕິບັດຕາມແນວທາງທີ່ຈີນກໍານົດໃຫ້

ພ້ອມລະບຸມີຄວາມຄາດຫວັງວ່າສະຖານະການຄວາມເຄັ່ງຕຶງຈະຜ່ອນຜັນລົງ ຈະບໍ່ປະພຶດສິ່ງທີ່ບໍ່ດີ ແຕ່ນັ້ນບໍ່ໄດ້ໝາຍຄວາມວ່າຄົນໄຕ້ຫວັນຈະຍອມແພ້ຕໍ່ຄວາມກົດດັນຈາກຈີນ ເພາະວ່າເສັ້ນທາງທີ່ຈີນວາງໄວ້ນັ້ນບໍ່ໄດ້ໃຫ້ມາຟຣີໆ ແລະ ມັນບໍ່ແມ່ນວິທີປະຊາທິປະໄຕຂອງປະຊາຊົນໄຕ້ຫວັນທັງ 23 ລ້ານຄົນ.

ຄວາມເຄື່ອນໄຫວຂອງຜູ້ນໍາຍິງຂອງໄຕ້ຫວັນໃນຄັ້ງນີ້ ມີຂຶ້ນຫຼັງຈາກທີ່ ປະທານາທິບໍດີ ສີຈິ້ນຜິງ ກ່າວໃນໂອກາດຄົບຮອບ 110 ປີ ການປະຕິວັດຊິນໄຮ ທີ່ນໍາຈີນສູ່ລະບອບສັງຄົມໃໝ່ ແລະ ນໍາໄປສູ່ສົງຄາມກາງເມືອງທີ່ແບ່ງແຍກແຜ່ນດິນໃຫຍ່ອອກຈາກໄຕ້ຫວັນ ໂດຍສີຈິ້ນຜິງ ປະກາດຊັດເຈນວ່າ ລັດຖະບານພັກກອມມູນນິກຈີນຈະຕ້ອງຮ່ວມຊາດຈີນແຜ່ນດິນໃຫຍ່ກັບໄຕ້ຫວັນໃຫ້ສໍາເລັດ ເພາະຖືເປັນຜົນປະໂຫຍດຂອງຈີນ.

ສີຈິ້ນຜິງ ໄດ້ກ່າວຕື່ມວ່າ ຊາວຈີນມີປະເພນີອັນຮຸ່ງເຮືອງໃນການຕໍ່ຕ້ານການແບ່ງແຍກ ແລະ ຍົກກໍລະນີການແບ່ງແຍກແດນເປັນອິດສະລະຂອງໄຕ້ຫວັນວ່າ ເປັນອຸປະສັກອັນໃຫຍ່ຫຼວງຕໍ່ການບັນລຸການຮ່ວມຊາດ ແລະ ເປັນອັນຕະລາຍຕໍ່ການຟື້ນຟູປະເທດ.