ບ່າວອິນເດຍເກັບສົບແມ່ໃນຕູ້ແຊ່ແຂງ ດົນເຖິງ 3 ປີ

ຕຳຫຼວດອິນເດຍຈັບກຸມລູກຊາຍແຊ່ສົບແມ່ໂຕເອງໄວ້ໃນຕູ້ແຊ່ແຂງດ້ວຍສານເຄມີດົນເຖິງ 3 ປີ

ວັນທີ່ 6 ເມສາ 2018 ບີບີຊີລາຍງານຂ່າວວ່າ ຕຳຫຼວດໃນເມືອງໂກລກາຕາ ປະເທດອິນເດຍ ໄດ້ຈັບກຸມທ້າວ Subhabrata Majumdar ຫຼັງຈາກພົບວ່າລາວໄດ້ເກັບສົບແມ່ໄວ້ຕູ້ເຢັນເຖິງ 3 ປີ ດ້ວຍການໃຊ້ເຄມີເກັບຮັກສາຮ່າງກາຍ

ຫຼັງຈາກຕຳຫຼວດໄດ້ຮັບໂທລະສັບແຈ້ງຈາກສາຍໂທລະສັບນິລະນາມເມື່ອວັນພຸດ ( 4 ເມສາ 2018 ) ຈຶ່ງໄດ້ເຂົ້າໄປບຸກຄົ້ນເຮືອນຂອງທ້າວ Subhabrata ເຮັດໃຫ້ພົບສົບດັ່ງກ່າວ ໂດຍລາວເຊື່ອວ່າການຮັກສາສົບຈະເຮັດໃຫ້ແມ່ໄປເກີດໃໝ່ໄດ້ ພ້ອມກັນນີ້ຍັງພົບວາລະສານກ່ຽວກັບການຮັກສາສົບ ແລະ ໜັງສືກ່ຽວກັບການເກີດໃໝ່ຫຼາຍສະບັບ

"ເຮົາພົບຮ່າງຂອງຍິງຄົນໜຶ່ງນອນຢູ່ໃນຕູ້ແຊ່ແຂງຂະໜາດໃຫຍ່ ໂດຍຖືກເກັບໄວ້ດ້ວຍສານເຄມີຫຼາຍສະນິດ" ຕຳຫຼວດກ່າວເພີ່ມຕື່ມວ່າ ຍັງພົບຊິ້ນສ່ວນຂອງຮ່າງກາຍໃນພາຊະນະອີກດ້ວຍ ຢ່າງໃດກໍ່ຕາມ ທ້າວ Subhabrata ເຮັດວຽກເປັນນັກເຄື່ອງໜັງ ເຊິ່ງອາດເປັນສ່ວນໜຶ່ງທີ່ເຮັດໃຫ້ລາວເຂົ້າເຖິງສານເຄມີທີ່ຈຳເປັນໃນການເກັບຮັກສາໄດ້

ຕາມລາຍງານລະບຸວ່າ ຫຼັງຈາກແມ່ຂອງທ້າວ Subhabrata ເສຍຊີວິດເມື່ອ ເມສາ 2015 ຄອບຄົວເລືອກທີ່ຈະບໍ່ເຜົາສົບນາງ ແຕ່ເລືອກເກັບໄວ້ໃນຕູ້ແຊ່ແຂງ ຂະໜາດໃຫຍ່ທີ່ໄວ້ໃຊ້ສຳຫຼັບແຊ່ກະແລັ້ມ

ນອກຈາກນີ້ຕຳຫຼວດຍັງກວດສອບນຳວ່າ ຊາຍຄົນດັ່ງກ່າວເກັບສົບໄວ້ເພື່ອໃຫ້ສາມາດໄດ້ຮັບເງິນບຳນານຕໍ່ຫຼືບໍ່ ເພາະທັງພໍ່ແມ່ຂອງທ້າວ Subhabrata ກະສຽນອາຍຸແລ້ວໄດ້ຮັບເງິນບຳນານ ແຕ່ຫາກເສຍຊີວິດກໍ່ຈະໄດ້ຮັບເງິນຕື່ມ ເມື່ອຕຳຫຼວດສອບສວນແລ້ວກັບພົບວ່າ ເງິນບຳນານຖືກຖອນຈາກບັນຊີຜູ້ເສຍຊີວິດເປັນປະຈຳ ຕັ້ງແຕ່ນາງເສຍຊີວິດ