ເຮືອ “ຫຼຽວໜິງ” ຊ້ອມຮົບດ້ວຍລູກປືນແທ້ໃນທະເລຈີນຕາເວັນອອກ

ກອງທັບເຮືອຈີນຝຶກຊ້ອມຮົບດ້ວຍອາວຸດແລະກະສຸນແທ້ ໃນເຂດນ່ານນ້ຳສາກົນໃນທະເລຈີນຕາເວັນອອກ ເມື່ອຊ່ວງຕົ້ນອາທິດນີ້ ໂດຍເຮືອບັນທຸກເຮືອບິນ “ຫຼຽວໜິງ” ເຂົ້າຮ່ວມກິດຈະກຳນຳ

 ສຳນັກງານຂ່າວຕ່າງປະເທດລາຍງານຈາກເມືອງປັກກິ່ງ ປະເທດຈີນ ເມື່ອວັນທີ 24 ເມສາ ໂດຍອ້າງຈາກລາຍງານຂອງສຳນັກງານຂ່າວຊິນຫົວ ວ່າກອງເຮືອຮົບຂອງກອງທັບປົດປ່ອຍປະຊາຊົນຈີນ (ພີແອວເອ) ນຳໂດຍເຮືອບັນທຸກເຮືອບິນຫຼຽວໜິງພ້ອມເຮືອຕິດຕາມ ເຂົ້າຮ່ວມພາລະກິດຝຶກຊ້ອມຮົບຕໍ່ຕ້ານອາກາດສະຍານ ແລະ ຕໍ່ຕ້ານເຮືອດຳນ້ຳ ໃນເຂດໜ້ານ້ຳສາກົນຂອງທະເລຈີນຕາເວັນອອກ ເມື່ອວັນອາທິດທີ່ຜ່ານມາ ຂະນະທີ່ຣັດຖະບານຍີ່ປຸ່ນຍັງບໍ່ສະແດງທ່າທີຕໍ່ການສະແດງອານຸພາບຂອງພີແອວເອໃນເທື່ອນີ້

ຄວາມເຄື່ອນໄຫວດັງກ່າວເກີດພຽງອາທິດດຽວ ຫຼັງກອງທັບເຮືອຂອງພີແອວເອປະຕິບັດພາລະກິດຝຶກຊ້ອມຮົບໂດຍໃຊ້ລູກປືນແທ້ ບໍລິເວນໜ້ານ້ຳສາກົນຂອງຊ່ອງແຄບຟໍໂມຊາ ເມື່ອວັນທີ່ 18 ເມສາ ທີ່ຜ່ານມາ ເຊິ່ງປະທານາທິບໍດີສີ ຈິ້ນຜິງ ເດີນທາງໄປເບິ່ງການຝຶກຊ້ອມດ້ວຍໂຕເອງ ແລະ ກ່າວປຸກຂວັນກຳລັງໃຈເຈົ້າໜ້າທີ່ທັງທະຫານ ແລະ ພົນລະເມືອງ ກ່ຽວກັບ “ຄວາມຈຳເປັນຢ່າງຮີບດ່ວນ” ໃນການເພີ່ມຂີດຄວາມສາມາດດ້ານການສູ້ຮົບທາງນ້ຳຂອງພີແອວເອ