ໂທລະສັບເກີດໄຟລຸກ ສາຍການບິນເນເທີແລນຂໍລົງຈອດສຸກເສີນທີ່ພູເກັດ

ສຳນັກງານຂ່າວຕ່າງປະເທດລາຍງານວ່າ ເຮືອບິນສາຍການບິນເຄແອວເອັມຂອງເນເທີແລນສົ່ງສັນຍານຂໍລົງຈອດສຸກເສີນທີ່ເດີ່ນບິນນານາຊາດພູເກັດ ຫຼັງຈາກພົບກໍລະນີໄຟໄໝ້ພາຍໃນຫ້ອງໂດຍສານທີ່ມາຈາກໂທລະສັບມືຖືຂອງຜູ້ໂດຍສານເມື່ອ 8 ພຶດສະພາທີ່ຜ່ານມາ

ຕາມລາຍງານລະບຸວ່າ ເຮືອບິນໂບອິ້ງ 777 ຂອງສາຍການບິນເຄແອວເອັມ ທ້ຽວບິນທີ່ KL809 ເດີນທາງມາຈາກປະເທດເນເທີແລນ ເພື່ອມຸ່ງໜ້າໄປຫາປາຍທາງທີ່ເມືອງກົວລາລຳເປີ ປະເທດມາເລເຊຍ ແຕ່ໄດ້ສົ່ງສັນຍານມາຫໍບັງຄັບການບິນເດີນບິນນານາຊາດພູເກັດ ເພື່ອຂໍລົງຈອດສຸກເສີນ ຫຼັງພົບບັນຫາໄຟໄໝ້ ພາຍໃນຫ້ອງໂດຍສານ

ໂດຍກໍລະນີທີ່ເກີດຂຶ້ນນັ້ນ ທາງສາຍການບິນໄດ້ອອກມາຖະແຫຼງການວ່າ ສາເຫດເກີດຈາກຜູ້ໂດຍສານຄົນໜຶ່ງໄດ້ເຮັດໂທລະສັບຕົກກະທົບເບາະຫຼັງ ກ່ອນທີ່ແບັດໂທລະສັບຈະເລີ່ມຮ້ອນຂຶ້ນເຮັດໃຫ້ລະບົບບັນຈຸໄຟຟ້າຂອງໂທລະສັບລັດວົງຈອນ ແລະ ເກີດໄຟລຸກໄໝ້ພ້ອມກັບມີຄວັນຂຶ້ນຢູ່ຫ້ອງຜູ້ໂດຍສານ

ທັງນີ້ທ້ຽວບິນທີ່ KL809 ສາມາດນຳເຄື່ອງລົງຈອດທີ່ເດີ່ນບິນນານາຊາດພູເກັດໄດ້ຢ່າງປອດໄພໂດຍບໍມີລາຍງານບາດເຈັບຫຼືໄດ້ຮັບອັນຕະລາຍໃດໆ ທາງການສາຍການບິນໄດ້ຕັດສິນໃຈລະງັບການບິນທ້ຽວບິນຊົ່ວຄາວ ພ້ອມກັບລຳລຽງຜູ້ໂດຍສານເຂົ້າພັກທີ່ໂຮງແຮມ ແລະ ໄດ້ສືບຕໍ່ການບິນໄປປາຍທາງທີ່ມາເລເຊຍໃນມື້ນີ້ 10 ພຶດສະພາ